الاثنين، 12 يناير 2009

خريط .. لو مو خريط ؟

ادري العنوان اليوم غريب بس لان اني قررت اطلع من دوري كصحفية وامارس دوري كبلوكرية ...و عليه قررت اليوم ان اكتب بالعامية . لمن رح تقرون اليوم " اذا قريتوا" لو رح تكولون على الي رح اكتبه صح لو رح تكولون هذا حجي " خريط " ومنا بالضبط اجا اسم مقالتي اليوم.
اني " واعوذ بالله من كلمة اني" انتبهت الى نقطة معينة ومهمة جدا ما اعرف رح تأيدوني بيها لو لا ؟ وهي انو احنا العراقيين " واعوذ بالله من كلمة احنا" نختلف عن كل اخوانا العرب مع احترامي لكل العرب ، انو عدنا اشياء هواية ما عدهمياها . هذي الاشياء هي الي تجمعنا وتخلينا متكتلين بينا – يعني مسويين كروب – مثلا .. مثلا كبة الحلب أأأأأأأأأأأأأأخخخخخخخخ
شكد طيبة , لا لا لا تكلولولي اكو احد ميحب كبة الحلب !!!
لكن السؤال الي يطرح نفسه هو : ليش اسمها كبة حلب ؟ ليش ما انسميها كبة بغداد ؟ لانو من خلال زيارتي لجيراننا (سوريا) اكتشفت انو همة ما عدهم هذي الكبة بس عدهم كبة تشبه مكوناتها بس مو اسمها كبة حلب ، زين .. لعد ليش كبة حلب ؟
الشي الثاني الي شاغلني هم ، هو ما اعرف اذا انتوا منتبهين على جمال الكلمة العراقية في الاغاني القديمة او التراثية ، يعني بصراحة ما اتصور اكو اغاني مثل اغانينا – سامحوني على الغرور – بس صدكوني منو يغني " مرينا بيكم حمد واحنا بقطار الليل واسمعنا دك كهوة وشمينا ريحة هيل " والبقية عدكم ، لو اغنية " يالزارع البزر نكوش ازرع لنا حنة " ومقطعها الاحلى بالنسبة الي " دك الحديد على الحديد تسمع له رنة " ، اني ما اريد اطول و اقلب مواجع عليكم بس رح اكلكم سر : اني ما جنت انام واني صغيرة لمن جانوا (كانوا) اهلي يدرسون في بلاد الاستعمار الا اذا بيبيتي ( جدتي ان صح القول) تغنيلي اغنية -دمرتها مو؟-
"ياحمام ..ياحمام ودي لحبابي من عندي سلام".
كل يوم رح نذكر اني وياكم شي .ها خريط لو مو خريط؟
ومني الكم احلى سلام.

هناك تعليقان (2):

  1. هو خريط بس مو خريط :)

    اليوم متصدكين شصار؟ بحديقةالمشغل اكو شجره و اليوم رجع الزمن عشرين سنة لما اكلت نبك عبالك عمري مماكلته.
    اتذكرت كل المتعلقات بقصص النبك و بيت جدو و بيتنا و المدرسة.. ايام الحرب و السلم :)

    ردحذف
  2. كبة الحلب اذا مو وياهة نومي حامض ما تصير الهة طعم...
    اني عن نفسي احب انه اخط الكباية وية شيف نومي حامض واملحهم والفهم بلحاف من الخبز او الصمون الحجري (حسب المتوفر) وما اتوقف عن الاكل حتى احس انه (كافي حرام عليك نفسك)
    بس عموما اني ما جنت اسمع هاي الاغاني من جنت بالعراق وانما بديت اسمعهة من طلعت من العراق، يعني ياس خضر مثلا، جنت اموت ولا اسمع صوته، لكن بعد ما طلعت من البلد كمت اسمعه ومو بس اسمعهة وانما اطرب من ااسمع هاي الاغاني..

    تدوينة حلوة ومو "خريط" أبداً

    أبو الحسن

    ردحذف